O‘zbekistonga keluvchi sayyohlar soni oshdi
O‘zbekiston turizm sohasida yangi yutuqqa erishdi. Bu haqda Zamin.uz xabar berdi.
2025 yil aprel oyidan boshlab mamlakat har oyda bir milliondan ortiq xorijiy sayyohni qabul qilmoqda. Milliy statistika qo‘mitasining ma’lumotlariga ko‘ra, joriy yilning dastlabki to‘qqiz oyida O‘zbekistonga tashrif buyurgan turistlar soni 8,6 milliondan oshdi.
Bu ko‘rsatkich o‘tgan yilning shu davriga nisbatan 112,5 foizga o‘sish bo‘lganini bildiradi. Turistlar oqimining keskin o‘sishi ayniqsa ayrim davlatlar bo‘yicha aniq seziladi.
Masalan, Britaniyadan keluvchi sayyohlar soni 2,6 baravar, Qatardan keluvchilar 6,2 baravar, AQSHdan keluvchilar 3 baravar ko‘paygan. Shuningdek, Fransiya, Rossiya, Vengriya, Germaniya va Polsha davlatlaridan keluvchi sayyohlar sonida ham sezilarli o‘sish qayd etildi.
Joriy yilda turistik xizmatlar eksporti ham o‘sib, 3,6 milliard AQSH dollaridan oshdi. Mutasaddilar fikricha, bu muvaffaqiyat O‘zbekistonning turizm salohiyatini oshirish, xalqaro aviaqatnovlarni kengaytirish va xizmat sifatini yaxshilash bo‘yicha olib borilgan islohotlar natijasidir.
Manba: milliy statistika qo‘mitasi.
