Oksfordda o‘zbek tili darsi boshlanadi
Oksford universitetida o‘zbek va eski o‘zbek tillari o‘qitila boshlaydi. Bu haqda Zamin.uz xabar berdi.
Bu haqda O‘zbekiston prezidenti administratsiyasi rahbari Saida Mirziyoyeva ma’lum qildi. Uning so‘zlariga ko‘ra, universitetning Osiyo va Yaqin Sharq tadqiqotlari fakulteti o‘z dasturlariga o‘zbek tilini kiritish orqali mamlakatimiz madaniy merosiga bo‘lgan hurmat va qiziqishni namoyon etmoqda.
Saida Mirziyoyeva universitet rahbariyati tomonidan taqdim etilgan mukofotni qabul qilganidan mamnunligini bildirdi. Bu mukofot O‘zbekistonda xotin-qizlar huquqlarini himoya qilish va ularning imkoniyatlarini kengaytirish bo‘yicha amalga oshirilayotgan islohotlarga berilgan yuqori bahodir.
Tashrif davomida Mirziyoyeva Oksfordning mashhur Bodlian kutubxonasi bilan tanishdi. Ushbu kutubxonada Mirzo Ulug‘bekning “Ziji Ko‘ragoniy” asari, Alisher Navoiyning “Xamsa”si, Husayn Boyqaroning “Devoni Husayniy” to‘plami va Boburiylar davriga oid noyob miniatyuralar saqlanmoqda.
Saida Mirziyoyeva ta’kidlashicha, bu yerda saqlanayotgan har bir kitob nafaqat ilm, balki tarix va madaniyat guvohidir. O‘zbek madaniy merosining shunday nufuzli ilmiy markazda o‘rganilishi mamlakatimizning xalqaro maydondagi nufuzini yanada oshiradi.
Shunday qilib, Oksford universitetida o‘zbek tilining o‘qitilishi nafaqat til, balki millat madaniyati, adabiyoti va tarixini dunyo miqyosida kengroq tanitishga xizmat qiladigan muhim qadamdir. Bu yangilik mamlakatimizning ilmiy va madaniy salohiyatini yanada rivojlantirishga hissa qo‘shadi.
Manba: zamin.uz
