O‘zbekistonda ilk xalqaro halol sertifikatlash boshlandi
O‘zbekistonda ilk marotaba xalqaro “Halol” akkreditatsiyasiga ega bo‘lgan sertifikatlash organi faoliyat boshladi. Bu haqda Zamin.uz xabar berdi.
Bu haqda O‘zbekiston ilmiy-sinov va sifat nazorati markazi ma’lumot berdi. Mazkur organ markaz tarkibida tashkil etilgan bo‘lib, Turkiyaning “Halal Accreditation Agency” tomonidan xalqaro standartlarga javob beruvchi tashkilot sifatida tan olingan.
Bu esa “halol” sertifikatini olishni istagan korxonalar uchun muhim qadam bo‘ladi. Mutaxassislarning fikricha, “halol” sertifikati O‘zbekiston mahsulotlarini, ayniqsa, islomiy davlatlarga eksport qilishda katta imkoniyatlar yaratadi.
Statistik ma’lumotlarga ko‘ra, “halol” oziq-ovqat bozori hajmi 2 trillion dollarni tashkil etsa, “halol” turizm bozori esa 400 milliard dollar atrofida baholanmoqda. Ushbu sertifikatlash organining tashkil etilishi mamlakatimizda “halol” mahsulotlar va xizmatlar sohasining rivojlanishiga yangi turtki beradi.
Manba: zamin.uz
