O‘zbekiston va Yevropa Ittifoqi yangi hamkorlik bitimi imzolaydi
O‘zbekiston prezidenti 2025 yil 24 oktabr kuni Bryussel shahriga rasmiy tashrif uyushtiradi. Bu haqda Zamin.uz xabar berdi.
Ushbu safar doirasida Yevropa Ittifoqi bilan Kengaytirilgan sheriklik va hamkorlik to‘g‘risidagi bitim imzolanishi kutilmoqda. Bu haqda Euronews xabar berdi.
Bitim siyosiy muloqot, savdo va xavfsizlik sohalaridagi hamkorlikni yangi bosqichga olib chiqishni, ikki tomonlama munosabatlarni mustahkamlashni va islohotlar hamda barqaror rivojlanish jarayonlarini qo‘llab-quvvatlashni maqsad qilgan. Ma’lumotlarga ko‘ra, ushbu kelishuv ikki tomonning islohotlar yo‘lida intilishini, iqtisodiyotni modernizatsiya qilish va xalqaro maydondagi hamkorlikni yanada chuqurlashtirish niyatini tasdiqlaydi.
Shuningdek, bitim joriy yil noyabr oyida Toshkentda o‘tkaziladigan “Yevropa Ittifoqi — Markaziy Osiyo” investitsiya forumi kabi muhim tashabbuslar uchun poydevor bo‘lib xizmat qiladi. Kengaytirilgan sheriklik va hamkorlik to‘g‘risidagi bitim Yevropa Ittifoqi va O‘zbekiston o‘rtasidagi munosabatlarni rivojlantirishda zamonaviy huquqiy asos bo‘lib qoladi.
U savdo, iqtisodiyot, fan, ta’lim, ekologiya va innovatsiyalar sohalarida hamkorlikni yangi yo‘nalishlarda kengaytirishni ko‘zda tutadi. O‘zbekiston Tashqi ishlar vazirligi ma’lumot berishicha, ushbu bitim 1996 yilda imzolangan ilk shartnomaning o‘rnini bosadi va mamlakat taraqqiyotining yangi bosqichini ifodalaydi.
Vazirlik izohida aytilishicha, hujjat O‘zbekistonning so‘nggi yillardagi siyosiy, iqtisodiy va institutsional taraqqiyotini aniq ko‘rsatadi. Ekspertlar fikricha, yangi kelishuv nafaqat Yevropa bilan munosabatlarni sifat jihatidan yangi bosqichga olib chiqadi, balki O‘zbekistonning xalqaro maydondagi nufuzini oshirishga xizmat qiladi.
Bryussel bilan imzolanishi kutilayotgan bitim mamlakatni global iqtisodiy jarayonlarga yanada chuqurroq integratsiya qilish imkonini beradi. Shu tariqa, yangi bitim O‘zbekistonning islohotlar, ochiqlik va barqaror rivojlanish yo‘lida qattiq qadam tashlaganini tasdiqlaydi.
Manba: Euronews.
