Davlat boshqaruvida sun’iy intellekt joriy etiladi
Sun’iy intellekt endilikda faqat axborot texnologiyalari sohasining emas, balki barcha davlat boshqaruvi tizimlarining asosiy yo‘nalishlaridan biriga aylanishi ko‘zda tutilmoqda. Bu haqda Zamin.uz xabar berdi.
Prezident Shavkat Mirziyoyevning qaroriga muvofiq, barcha vazirlik va tarmoqlarda raqamlashtirish uchun mas’ul o‘rinbosarlar sun’iy intellekt sohasida ham javobgar bo‘ladi. Shuningdek, shahar va tuman hokimliklarida raqamlashtirish va sun’iy intellekt bo‘yicha maslahatchilar lavozimlari tashkil etiladi.
Bu esa har bir hududda zamonaviy texnologiyalarni samarali joriy etish uchun maxsus javobgar shaxslarning bo‘lishini ta’minlaydi. Bundan tashqari, barcha vazirlik va hokimliklarda sun’iy intellektni rivojlantirishga ixtisoslashgan bo‘linmalar tashkil etilishi shart.
Ularning asosiy vazifalari xizmat ko‘rsatish sifatini oshirish, ish samaradorligini yaxshilash, byurokratiya va ortiqcha xarajatlarni kamaytirish hamda yashirin iqtisodiyotga qarshi kurashishdan iborat. Eng muhimi, sun’iy intellekt yordamida yangi innovatsion yechimlar ishlab chiqiladi.
Davlat boshqaruvida amalga oshirilayotgan ushbu islohotlar fuqarolar hayotida ham qulayliklar yaratadi. Masalan, hujjat aylanishi va ariza topshirish jarayonlari avtomatlashtirilsa, vaqt tejab qoladi, inson omili kamayadi va tizim shaffofligi oshadi.
Shuningdek, xorijiy tajribalar o‘rganilishi uchun maxsus dasturlar tashkil etiladi. Prezident tashabbusi bilan texnologiya va xorijiy tillarni mukammal bilgan yuzga yaqin mutaxassis Amerika Qo‘shma Shtatlari, Yevropa, Singapur va Yaponiya kabi davlatlarga olti oylik malaka oshirish kurslariga yuboriladi.
Ular o‘z yurtlariga qaytgach, sun’iy intellektni amaliyotga joriy etishda yetakchi rol o‘ynaydi. Kelgusi yildan boshlab barcha vazirlik va hududlarda sun’iy intellektni qo‘llash darajasini baholaydigan reyting tizimi joriy etiladi.
Bu tizim orqali qaysi tashkilotlar innovatsiyalarga ochiq, qaysilari esa an’anaviy usullarga tayanayotganini aniqlash mumkin bo‘ladi. Zamonaviy texnologiyalar tez rivojlanayotgan bir paytda bunday tashabbuslar mamlakatni yangi bosqichga olib chiqadi, boshqaruv tizimini aqlli, tezkor va samarali qiladi.
Manba: Prezident.uz
