Oliy ta’limda tyutorlik tizimi joriy etiladi
O‘zbekiston Vazirlar Mahkamasi oliy ta’lim muassasalarida tyutorlik faoliyatini tashkil etish bo‘yicha yangi qaror qabul qildi. Bu haqda Zamin.uz xabar berdi.
Ushbu qarorga muvofiq, universitet va institutlarda talabalar bilan individual ishlash tizimi joriy etiladi. Tyutorlik amaliyoti orqali talabalarning ta’lim jarayoniga moslashishi osonlashtiriladi va ular bilan shaxsiy tarzda ishlash mexanizmi takomillashtiriladi.
Tyutorlarning asosiy vazifalari qatorida talabalarni ta’lim muhitiga tezroq moslashishi uchun yordam berish, axborot texnologiyalari va resurslaridan foydalanish bo‘yicha maslahatlar berish, shuningdek, talabalar bilan individual va guruh suhbatlarini tashkil etish kiradi. Ular talabalarni universitet ichki qoidalari, axloq kodeksi va boshqa mahalliy hujjatlar bilan tanishtiradi.
Bundan tashqari, tyutorlar yoshlarni vatanparvarlik, bag‘rikenglik, qonunlarga hurmat, hayotga ishonch va qat’iyatlilik ruhida tarbiyalashga mas’uldir. Sog‘lom turmush tarzini shakllantirish ham ularning muhim yo‘nalishlaridan biri bo‘lib, bo‘sh vaqtni mazmunli tashkil etish, sport va jismoniy faollikni rag‘batlantirishda faol ishtirok etadi.
Nogironligi bo‘lgan talabalar, yetimlar va ijtimoiy himoyaga muhtoj yoshlar uchun alohida yechimlar ishlab chiqish ham tyutorlarning zimmasida. Har bir tyutorga 1–3 kursda tahsil olayotgan 120–150 nafar talaba biriktiriladi.
Ularning yashash sharoiti va ijtimoiy ahvoli doimiy nazorat qilinadi hamda ota-onalar bilan muntazam aloqa o‘rnatiladi. Tyutor bo‘lish uchun oliy ma’lumot talab qilinadi, ilmiy daraja yoki unvonga ega bo‘lganlarga ustunlik beriladi.
Nomzod pedagogik va psixologik bilimga, tarbiyaviy ishlar bo‘yicha tajribaga hamda madaniyat, faollik, mas’uliyat va tashabbuskorlik kabi shaxsiy fazilatlarga ega bo‘lishi zarur. Yangi tizim samaradorligini o‘lchash uchun maxsus ko‘rsatkichlar (KPI) joriy etiladi.
Bu orqali har bir tyutor faoliyati aniq natijalar asosida baholanadi. Mutasaddilarning ta’kidlashicha, tyutorlik tizimi talabalarning ta’limga munosabatini yaxshilaydi, ularning shaxsiy rivojlanishini qo‘llab-quvvatlaydi hamda oliy ta’lim muassasalarida ma’naviy muhitni mustahkamlashga xizmat qiladi (manba: zamin.uz).
