O‘zbekistonlik haydovchilar Dubayda ishga qabul qilinadi
O‘zbekistonlik haydovchilar uchun yangi ish imkoniyati yuzaga keldi. Bu haqda Zamin.uz xabar berdi.
O‘zbekiston Bosh konsulxonasi va Birlashgan Arab Amirliklaridagi “Dubai Taxi Company PJSC” rahbariyati o‘rtasida ikki tomonlama muzokaralar bo‘lib o‘tdi. Uchrashuvda O‘zbekistondan malakali haydovchilarni BAAda qonuniy asosda ishga joylashtirish, ularning huquqlarini himoya qilish hamda mehnat shartlarini shaffof tashkil etish masalalari muhokama qilindi.
Kompaniya rahbari Sayid Amin Abdulrahman o‘zbekistonlik haydovchilarning mas’uliyati va tajribasini yuqori baholab, ularni Dubay taksi xizmatida ishga jalb etishga tayyorligini ma’lum qildi. Dastlabki bosqichda 200 nafar haydovchi ishga qabul qilinishi rejalashtirilgan.
Agar ularning faoliyati samarali bo‘lsa, yana 500 nafargacha o‘zbekistonlik fuqarolarni ishga olish ko‘zda tutilgan. Muzokaralar yakunida O‘zbekiston Mehnat agentligi va “Dubai Taxi Company PJSC” kompaniyasi o‘rtasida hamkorlikni amaliy bosqichga olib chiqish to‘g‘risida kelishuvga erishildi.
Mutaxassislarning fikricha, mazkur loyiha nafaqat ish bilan ta’minlash sohasida muhim qadam, balki o‘zbekistonlik haydovchilarning xorijdagi mehnat bozori obro‘sini yanada mustahkamlashga xizmat qiladi (manba: zamin.uz).
