Mirziyoyev noyabrda AQSHdagi C5+1 sammitida qatnashadi
O‘zbekiston prezidenti Shavkat Mirziyoyev noyabr oyida Amerika Qo‘shma Shtatlariga amaliy tashrif bilan boradi. Bu haqda Zamin.uz xabar berdi.
Ushbu tashrif doirasida u AQSH prezidenti Donald Tramp ishtirokidagi C5+1 formatidagi sammitda qatnashadi. Sammit 6 noyabr kuni Vashington shahrida o‘tkaziladi.
Tadbirda Markaziy Osiyo davlatlari — O‘zbekiston, Qozog‘iston, Qirg‘iziston, Tojikiston va Turkmaniston rahbarlari ishtirok etishi rejalashtirilgan. AQSH tomonidan mazkur sammitga tayyorgarlik ko‘rish maqsadida Janubiy va Markaziy Osiyo bo‘yicha maxsus vakil Serjio Gor hamda Davlat kotibi o‘rinbosari Kristofer Landau Toshkentga tashrif buyurdi.
Ular mintaqaviy hamkorlik masalalarini muhokama qilgach, Qozog‘istonga yo‘l olishdi. Qozog‘iston prezidenti Qosim-Jo‘mart To‘qayev Donald Trampning taklifi uchun minnatdorlik bildirdi.
Sammitda iqtisodiy sheriklik, xavfsizlik va savdo sohalaridagi yangi tashabbuslar muhokama qilinishi kutilmoqda. Shavkat Mirziyoyev joriy yilning sentabr oyida ham Donald Tramp bilan qisqa uchrashuv o‘tkazgan edi.
Ushbu muzokaralar ikki davlat o‘rtasidagi munosabatlarni yanada mustahkamlashga xizmat qiladi. Manba: zamin.uz
