O‘zbekiston baxt reytingida 53-o‘rinni egalladi

2025-yil uchun tuzilgan World Happiness Report reytingida O‘zbekiston 147 ta davlat orasida 53-o‘rinni egalladi. Bu haqda Zamin.uz xabar berdi.

Ushbu tadqiqotda aholining turmush darajasi va hayot sifatiga oid bir qator omillar tahlil qilindi. Xususan, daromad darajasi, sog‘liqni saqlash holati, jamiyat ichidagi ishonch, shaxsiy tanlov erkinligi va jamiyat tomonidan ko‘rsatiladigan qo‘llab-quvvatlash kabi mezonlar hisobga olindi.

Shuningdek, aholining o‘z hayotidan qoniqish darajasi ham muhim omil sifatida baholandi. Reytingning birinchi o‘rnini avvalgidek Finlyandiya egalladi va dunyoning eng baxtli davlatlaridan biri sifatida yana bir bor e’tirof etildi.

Afg‘oniston esa oxirgi o‘rinda qolmoqda. Markaziy Osiyo davlatlari orasida Qozog‘iston eng yuqori ko‘rsatkichga ega bo‘lib, 40-o‘rinni egalladi.

O‘zbekiston 53-o‘rinda, Qirg‘iziston 64-o‘rinda, Tojikiston 80-o‘rinda, Turkmaniston esa 91-o‘rinda joylashdi. Mazkur reyting BMT ko‘magida tuzilgan bo‘lib, 2022–2024-yillarda o‘tkazilgan so‘rovlar natijalariga asoslangan.

Manba: Zamin.uz.