O‘zbekiston va Gruziya hamkorligi yangi bosqichda
29-oktabr kuni Samarqandda O‘zbekiston tashqi ishlar vaziri Baxtiyor Saidov va Gruziya tashqi ishlar vaziri Maka Bochorişvili uchrashuvi bo‘lib o‘tdi. Bu haqda Zamin.uz xabar berdi.
Muzokaralar davomida ikki tomonlama hamkorlikni rivojlantirish va strategik yo‘nalishlarni muhokama qilish masalalariga e’tibor qaratildi. Uchrashuvda transport va logistika sohalaridagi hamkorlik asosiy mavzu bo‘ldi.
Tomonlar Osiyo va Yevropani bog‘lovchi O‘rta yo‘lakni rivojlantirishning ahamiyatini ta’kidlab, bu yo‘nalishning O‘zbekiston uchun dengizga chiqish imkoniyatlarini yaratishdagi o‘rni haqida fikr almashdilar. Ayniqsa, Gruziya portlari orqali xalqaro bozorga chiqish masalasi muhim deb topildi.
Shuningdek, qishloq xo‘jaligi sohasida hamkorlikni kengaytirish masalalari ko‘rib chiqildi. Qishloq xo‘jalik mahsulotlarini o‘zaro yetkazib berish bo‘yicha yangi imkoniyatlar muhokama qilindi.
Sanoat sohasidagi qo‘shma loyihalar amalga oshirilishi uchun katta salohiyat borligi qayd etildi. Madaniy aloqalar va turizm ham ustuvor yo‘nalishlardan biri sifatida belgilandi.
Gruziyaga tashrif buyurayotgan o‘zbek sayyohlari sonining o‘sishi ikki xalq o‘rtasidagi do‘stona munosabatlarning mustahkamlanayotganini ko‘rsatmoqda. UNESCOning xalqaro tadbiri doirasida o‘tkazilgan ushbu uchrashuv Toshkent va Tbilisining o‘zaro manfaatli hamkorlikni rivojlantirishga bo‘lgan intilishini yana bir bor tasdiqladi.
Tomonlar erishilgan kelishuvlarni amaliyotga joriy qilish uchun yaqin hamkorlikni davom ettirishga kelishib oldilar.
