O‘zbekiston Prezidenti Shavkat Mirziyoyev AQShning savdo vaziri Xovard Latnik bilan Vashington shahrida uchrashuv o‘tkazdi. Bu haqda Zamin.uz xabar berdi.
Muzokaralar davomida O‘zbekiston va AQSh o‘rtasidagi strategik sheriklikni yanada rivojlantirish masalalari muhokama qilindi. Xususan, savdo va investitsiya sohalaridagi hamkorlikni faollashtirish, iqtisodiyotning turli tarmoqlarida qo‘shma loyihalarni amalga oshirishga alohida e’tibor qaratildi.
Uchrashuvda O‘zbekiston va AQSh o‘rtasidagi ko‘p qirrali aloqalar izchil rivojlanayotgani qayd etildi. So‘nggi yillarda ikki davlat o‘rtasidagi tovar ayirboshlash hajmi to‘rt barobar oshib, qariyb 1 milliard dollarga yetgan.
Bugungi kunda O‘zbekistonda AQShning 300 dan ortiq kompaniyasi faoliyat yuritmoqda. Ular sanoat, qishloq xo‘jaligi, energetika va innovatsiya sohalarida yirik loyihalarni amalga oshirmoqda.
Savdo aloqalarini yanada mustahkamlash va hududlararo hamkorlikni rivojlantirish bo‘yicha samarali mexanizmlar yaratish masalalari ham muhokama qilindi. Shuningdek, tomonlar Muvofiqlashtiruvchi kengash tashkil etishdan manfaatdor ekanliklarini bildirishdi.
Muzokaralarda qishloq xo‘jaligi sohasidagi hamkorlikka alohida e’tibor qaratildi. AQShdan soya va paxta yetkazib berish, shuningdek, ilg‘or tomchilatib sug‘orish texnologiyalarini joriy etish bo‘yicha dastlabki kelishuvlarga erishildi.
Uchrashuv yakunida qo‘shma loyihalarni qo‘llab-quvvatlash uchun maxsus investitsiya platformasini tashkil etish orqali amaliy hamkorlikni faollashtirishga kelishib olindi. Manba: zamin.uz
