O‘zbekistonlik talaba Koreyada xalqaro tanlov g‘olibi bo‘ldi
O‘zbekistonlik talaba Sabohat G‘ofurova Koreyada tashkil etilgan xalqaro tanlovda birinchi o‘rinni qo‘lga kiritdi. Bu haqda Zamin.uz xabar berdi.
Ushbu nufuzli musobaqa Koreya Respublikasining eng mashhur ta’lim dargohlaridan biri bo‘lgan Yonse universitetida o‘tkazildi. Toshkent davlat sharqshunoslik universitetining 4-bosqich talabasi Sabohat G‘ofurova tanlovda 76 davlatdan kelgan 1400 nafardan ortiq ishtirokchilar orasida g‘olib bo‘ldi.
Bu yutuq nafaqat Sabohatning, balki butun O‘zbekiston yoshlarining xalqaro miqyosdagi muvaffaqiyatlaridan biri sifatida baholanmoqda. Mazkur tanlov Koreya yozuvi — Xangulning yaratilishiga bag‘ishlangan tadbirlar doirasida o‘tkazildi.
Unda qatnashchilar “Oyna” mavzusida she’r va “Xotiralar” mavzusida esse yozish orqali o‘z ijodini namoyish qilishdi. Sabohatning asarlari hakamlar hay’atiga chuqur taassurot qoldirdi.
Uning ijodiy ishlari tilga bo‘lgan muhabbat, madaniyat va insoniy qadriyatlarni o‘zida aks ettirgani bilan ajralib turdi. Shu sababli u xorijlik ishtirokchilar orasida birinchi o‘rinni egallab, umumiy reytingda uchinchi o‘rinni qo‘lga kiritdi.
Yonse universiteti Osiyoning eng nufuzli oliy o‘quv yurtlaridan biri bo‘lib, dunyo bo‘ylab “Osiyoning Garvardi” sifatida tanilgan. Ushbu universitetda ta’lim olgan ko‘plab taniqli shaxslar, jumladan Samsung, LG, Hyundai kompaniyalari asoschilari ham bor.
O‘zbekistonlik talabalar uchun bu kabi muvaffaqiyatli ishtiroklar mamlakat ta’lim tizimida amalga oshirilayotgan islohotlarning amaliy natijasi hisoblanadi. Sabohat G‘ofurovaning ushbu yutug‘i yoshlarimizga yangi ilhom, xalqimizga esa katta faxr bag‘ishlaydi.
Bu g‘alaba mehnat, bilim va intizom orqali har qanday marraga erishish mumkinligini ko‘rsatuvchi yorqin misoldir. O‘zbekiston yoshlari xalqaro maydonda tobora yuqori natijalarga erishib, yurtimizning obro‘sini oshirmoqda.
Manba: zamin.uz
