O‘zbekiston Prezidenti Shavkat Mirziyoyev tibbiyot xodimlari va farmatsevtlarni qo‘llab-quvvatlash hamda rag‘batlantirishga qaratilgan qo‘shimcha chora-tadbirlarni tasdiqladi. Bu haqda Zamin.uz xabar berdi.
Ushbu qarorga muvofiq, 2026-yilning 1-yanvaridan va 1-aprelidan boshlab bir qator yangi imtiyozlar hamda qo‘shimcha to‘lovlar joriy etiladi. Mazkur chora-tadbirlar doirasida shifokorlar maoshiga 10 foiz qo‘shimcha ustama belgilanishi, ipoteka kreditining 25 foizini davlat tomonidan qoplash, xodimlarning farzandlarini o‘qitish xarajatlarini qoplash, shuningdek, 30 million so‘mgacha mukofotlar ajratilishi ko‘zda tutilgan.
Shuningdek, ilmiy maqolalarni chop etish xarajatlari davlat hisobidan qoplanadi, shifokorlarga bepul davolanish va sanatoriy xizmatlari taqdim etiladi. Davlat tibbiyot muassasalarida ishlovchi xodimlar uchun besh kunlik ish haftasi kafolatlanadi.
Tibbiyot xodimlari kuni munosabati bilan eng yaxshi shifokorlar, shifoxona va poliklinika rahbarlari o‘rtasida tanlov o‘tkaziladi. G‘oliblar qimmatbaho mukofotlar bilan taqdirlanadi.
Shuningdek, davlat xalqaro miqyosda yuqori reytingga ega ilmiy jurnallarda shifokorlarning maqolalarini chop etish xarajatlarini ham qoplaydi. 2026-yilning 1-aprelidan boshlab barcha davlat tibbiyot muassasalari besh kunlik ish haftasiga o‘tadi.
Biroq dam olish kunlari va bayramlarda navbatchilik tartibi saqlanadi. Ushbu dastur uchun har yili davlat byudjetidan qo‘shimcha 100 milliard so‘m mablag‘ ajratiladi.
Dasturning amalga oshirilishi Bosh vazir Abdulla Aripov va Prezident Administratsiyasi rahbari o‘rinbosari Tohir Aliyev tomonidan nazorat qilinadi.
