O‘zbekiston va Saudiya Arabistoni Hajga tayyorgarlikni muhokama qildi
2026-yilgi Haj mavsumiga tayyorgarlik ko‘rish doirasida 2023-yil 9-noyabr kuni O‘zbekiston delegatsiyasi va Saudiya Arabistoni Haj va Umra vazirligi o‘rtasida uchrashuv bo‘lib o‘tdi. Bu haqda Zamin.uz xabar berdi.
Mazkur uchrashuvda Prezident maslahatchisi o‘rinbosari Muzaffar Qamolov, Diniy ishlar qo‘mitasi raisi Sodiq Toshboyev, muftiy shayx Nuriddin Xoliqnazar, attashe Shuxrat Amoniy hamda Saudiya Arabistoni haj va umra vaziri Tavfiq bin Fawzan ar-Rabiya va Saudiya Arabistonining O‘zbekistondagi elchisi Yusuf al-Utaybi ishtirok etdi. Uchrashuv davomida O‘zbekiston Prezidenti Shavkat Mirziyoyev va Saudiya Arabistoni qiroli Salmon ibn Abdulaziz al Saud hamda valiahd shahzoda Muhammad ibn Salmon al Saud o‘rtasidagi yaqin hamkorlikning ijobiy natijalari alohida ta’kidlandi.
Shuningdek, ikki davlat o‘rtasida delegatsiyalar almashinuvi ko‘paygani va ziyoratchilarga yuqori darajada xizmatlar ko‘rsatilayotgani qayd etildi. Muzokaralarda 2026-yilgi Haj mavsumiga oid yangi qoidalar muhokama qilindi.
Xususan, ziyoratchilarning xavfsizligini ta’minlashga, tibbiy talablarni qat’iy bajarishga, hujjatlarni o‘z vaqtida tayyorlashga va haj davridagi qoidalarga rioya qilishga alohida e’tibor qaratildi. Saudiya Arabistoni Haj va Umra vaziri O‘zbekiston tomonidan bu sohada amalga oshirilayotgan islohotlarni yuqori baholadi.
Shuningdek, uchrashuvda O‘zbekistonda Islom sivilizatsiyasi markazining va Samarqanddagi Imom Buxoriy majmuasining ochilish marosimlariga e’tibor qaratildi. Saudiya Arabistoni vakillari mazkur tadbirlarda ishtirok etish istagini bildirishdi.
Bundan tashqari, ziyorat turizmini rivojlantirish, ilmiy tadqiqotlarni qo‘llab-quvvatlash va qadimiy shaharlarga sayohatlar tashkil qilish masalalari ham ko‘rib chiqildi. Uchrashuv yakunida tomonlar bir qator masalalar bo‘yicha kelishuvga erishib, esdalik sovg‘alar almashishdi.
Mazkur uchrashuv ikki davlat o‘rtasidagi do‘stlik va hamkorlikni mustahkamlashga xizmat qilishi kutilmoqda.
