Milliy istiqbolli loyihalar agentligi (MILA) tomonidan Global Insurance sug‘urta kompaniyasining litsenziyasi 6 oy muddatga to‘xtatildi. Bu haqda Zamin.uz xabar berdi.
Ushbu qaror haqida agentlikning rasmiy veb-saytida e’lon qilingan. Qaror 8-noyabrdan boshlab kuchga kirgan.
Mazkur qaror asosida kompaniya amaldagi shartnomalar bo‘yicha faoliyatini davom ettiradi. Biroq yangi shartnomalar tuzish yoki mavjud shartnomalarni uzaytirish huquqiga ega emas.
Avvalroq, oktabr oyida MILA ushbu kompaniyaning litsenziyasini 10 kunga to‘xtatgan va 35 million so‘m miqdorida jarima belgilagan edi. O‘tgan yilda esa Global Insurance kompaniyasi avgust va aprel oylarida jami 72 million so‘m jarimaga tortilgan.
Kursiv Uzbekistan tomonidan 2023-yilda e’lon qilingan sug‘urta kompaniyalari reytingida Global Insurance «Umumiy sug‘urta» toifasida 27-o‘rinni egallagan. O‘sha davrda kompaniyaning aktivlari 57 milliard so‘mni tashkil etgan.
Ma’lum bo‘lishicha, Global Insurance 2008-yilning aprel oyida tashkil etilgan. Joriy yilning 10-noyabr holatiga ko‘ra, kompaniyaning ustav kapitali 35 milliard so‘mni tashkil qilmoqda.
