TIV fuqarolarni AQSh vizasini oldindan rasmiylashtirishga chaqirdi
O‘zbekiston Tashqi ishlar vazirligining Konsullik departamenti 2026 yilda AQShda o‘tkaziladigan futbol bo‘yicha Jahon chempionati oldidan vatandoshlarni viza masalasini oldindan hal qilishga chaqirdi. Bu haqda Zamin.uz xabar berdi.
Bu haqda “Dunyo” axborot agentligi xabar berdi. Ma’lum qilinishicha, AQSh hukumatining vizalar berish tartibida sezilarli o‘zgarishlar amalga oshirilgan.
Ayrim davlatlarda suhbatga yozilish uchun kutish muddati 6-8 haftagacha qisqartirilgani qayd etilgan. Biroq kelayotgan chempionat sababli vizaga bo‘lgan talab oshishi mumkinligi aytilmoqda.
Shuni unutmaslik kerakki, chempionat uchun chipta sotib olish AQSh vizasini olish yoki mamlakatga kirishni kafolatlamaydi. Chipta faqat suhbatga tezroq yozilish imkonini beradi.
Barcha fuqarolar standart tekshiruvlardan o‘tishi talab qilinadi. Tashqi ishlar vazirligi fuqarolarga faqat rasmiy manbalardan chiptalarni sotib olishni, noqonuniy ish takliflariga uchmaslikni va turist vizasi mehnat qilish huquqini bermasligini yodda tutishni tavsiya qilmoqda.
Shuningdek, AQShning migratsiya qoidalariga rioya qilish kelgusidagi imkoniyatlarga ijobiy ta’sir qilishi ta’kidlangan. Ushbu qoidalarga amal qilish ikki tomonlama hamkorlikni mustahkamlab, sayohat va biznes uchun qo‘shimcha imkoniyatlar yaratadi.
