O‘zbekistonda tibbiyotda raqamli tizimlar joriy etildi
O‘zbekistonda 36 milliondan ortiq fuqaroning tibbiy ma’lumotlari yagona elektron tizimga kiritildi. Bu haqda Zamin.uz xabar berdi.
Ushbu tizim DMED deb atalib, sog‘liqni saqlash sohasida raqamli xizmatlar joriy etilmoqda. Prezident Shavkat Mirziyoyev Samarqand shahrida joylashgan Raqamli sog‘liqni saqlash markazi va Respublika ixtisoslashtirilgan ilmiy-amaliy kardiologiya markazining Samarqand filialida amalga oshirilgan ishlar bilan tanishdi.
Ma’lum qilinishicha, tez yordam xizmatiga elektron boshqaruv tizimi joriy etilishi natijasida brigadalarning bemorlarga yetib borish vaqti sezilarli darajada qisqargan. Shuningdek, “Elektron retsept” tizimi orqali dori-darmonlarning asossiz buyurilish holatlari 40 foizga kamaygan va dori vositalarining aylanishi yanada shaffof bo‘lishi ta’minlangan.
Raqamli infratuzilmalar rivojlantirilib, 3 mingdan ortiq tibbiyot muassasalari tizimga ulangan va zarur kompyuter texnikalari xarid qilingan. Respublika ixtisoslashtirilgan ilmiy-amaliy kardiologiya markazining Samarqand filiali to‘liq yangilangan bo‘lib, ushbu loyiha uchun 52 milliard so‘m mablag‘ yo‘naltirilgan.
Markaz 100 o‘rinli bo‘lib, 262 turdagi zamonaviy tibbiy jihozlar bilan ta’minlangan. Mobil diagnostika yordamida 7 mingga yaqin bemor koronarografiyadan o‘tkazilgan va yurak operatsiyalari soni yiliga 383 tadan 590 tagacha oshirilgan.
Shuningdek, kardiokirurgiya bo‘yicha ordinatura tashkil etilib, malakali mutaxassislar tayyorlash yo‘lga qo‘yilgan. Manba: zamin.uz
