O‘zbekiston Respublikasi Prezidenti farmoyishiga asosan, 2026 yil 1 yanvardan boshlab davlat idoralarini to‘liq raqamlashtirish va ularning samaradorligini oshirishga qaratilgan “Byurokratiyani bartaraf etish – 2030” dasturi amalga oshiriladi. Bu haqda Zamin.uz xabar berdi.
Ushbu dastur davlat xizmatlarini soddalashtirish, ortiqcha rasmiyatchilikni kamaytirish va korrupsiya xavfini minimallashtirishni ko‘zda tutadi. Maqsad – zamonaviy, ochiq va inson manfaatlariga asoslangan boshqaruv tizimini shakllantirishdir.
Dasturning asosiy yo‘nalishlari aholi va tadbirkorlik subyektlariga qulaylik yaratishni o‘z ichiga oladi. Davlat xizmatlaridan foydalanish jarayonini osonlashtirish, biznesni qo‘llab-quvvatlash hamda xorijiy sarmoyalarni jalb etishga sharoit yaratish dasturda muhim o‘rin tutadi.
Shu bilan birga, raqamli boshqaruv tizimi orqali O‘zbekistonning xalqaro maydondagi ijobiy imijini mustahkamlash va keraksiz byurokratik tartiblarni bartaraf etish rejalashtirilgan. Dasturni amalga oshirish uchun Strategik rivojlanish va islohotlar agentligi huzurida Maxsus loyiha markazi tashkil etiladi.
Ushbu markaz xalqaro hamkorlar bilan hamkorlikda dastur bo‘yicha “yo‘l xaritasi”ni ishlab chiqadi va amalga oshirilgan ishlar haqida Prezidentga muntazam hisobot beradi. Shuningdek, byurokratiyani qisqartirishga oid takliflarni muhokama qilish va samaradorlikni baholash maqsadida Zero Bureaucracy nomli raqamli platforma ishga tushiriladi.
Farmoyishga ko‘ra, dastur ijrosini o‘z vaqtida va samarali tashkil etish uchun davlat tashkilotlari rahbarlariga shaxsiy javobgarlik yuklatilgan. Agentlik bir oy ichida loyiha ofisi faoliyatini yo‘lga qo‘yishi va Milliy mukofot tanlovining reglamentini ishlab chiqishi lozim.
Dastur ijrosi ustidan umumiy nazorat Prezidentning maslahatchisi Sardor Umrzoqovga topshirilgan. Manba: One.uz
