O‘zbekiston xalqaro metrik tizimga qo‘shildi
O‘zbekistonda ilmiy-texnik sohada muhim qadam qo‘yildi. Bu haqda Zamin.uz xabar berdi.
Yaqinda "Xalqaro metrik konvensiyaga O‘zbekiston Respublikasining qo‘shilishi to‘g‘risida"gi qonun qabul qilindi. Bu bilan mamlakat 1875-yilda imzolangan mazkur Konvensiyaning to‘laqonli ishtirokchisiga aylandi.
Ushbu qaror nafaqat rasmiy hujjat, balki metrologiya, fan, savdo va sanoat sohalarida sifat jihatidan yangi bosqichni boshlab beruvchi muhim qadam sifatida e’tirof etilmoqda. Xalqaro metrik konvensiyaga qo‘shilish orqali O‘zbekiston endi Xalqaro og‘irlik va o‘lchovlar byurosi (BIPM) faoliyatida ishtirok etadi.
Bu mamlakat uchun o‘lchov standartlarini jahon miqyosida yagona mezon asosida kelishib olish imkoniyatini taqdim etadi. Endilikda O‘zbekistonda amalga oshirilgan o‘lchovlar Konvensiya ishtirokchi davlatlari tomonidan tan olinadi.
Mazkur qaror tufayli milliy etalonlar xalqaro o‘lchov tizimiga moslashtiriladi. Masalan, massadan tortib uzunlik, harorat va vaqt kabi ko‘plab o‘lchov birliklari xalqaro standartlarga muvofiq ishlaydi.
Bu esa ichki va tashqi bozorda ishonchni oshiradi, shaffoflikni ta’minlaydi. Ayniqsa, texnik jihatdan eksport-import jarayonlarini soddalashtiradi, texnik to‘siqlarni kamaytiradi va mahsulot sifatini tasdiqlashni yengillashtiradi.
Bundan tashqari, sanoat, texnologiya, qishloq xo‘jaligi, tibbiyot va boshqa ko‘plab sohalar uchun yangi imkoniyatlar yaratiladi. Kalibrlash va sertifikatlash jarayonlari soddalashgani sababli ishlab chiqaruvchilar xalqaro bozorga chiqishni osonlashtiradi.
Ilm-fan sohasida ham keng imkoniyatlar ochiladi. Mahalliy laboratoriyalar va tadqiqot institutlari xalqaro standartlar bilan uyg‘unlashib ishlay boshlaydi.
Bu esa ilmiy-tadqiqot ishlarining sifatini oshiradi va innovatsion rivojlanishga turtki beradi. Mazkur qaror, shuningdek, investorlar ishonchini mustahkamlashda muhim rol o‘ynaydi.
Xalqaro hamkorlar va yirik tashkilotlar O‘zbekiston mahsulotlari va sertifikatlariga katta ishonch bilan qaraydi, bu esa iqtisodiy aloqalarni yanada rivojlantiradi. Qisqacha aytganda, ushbu qonun qabul qilinishi O‘zbekistonning global iqtisodiy tizimga integratsiyalashuvini kuchaytiradi, sanoat, ilm-fan va texnologiya sohalarida yangi imkoniyatlar eshigini ochadi.
Manba: Zamin.uz
