O‘zbekiston Respublikasi Prezidenti Shavkat Mirziyoyev energetika sohasidagi yangi obyektlar va yirik loyihalarni ishga tushirishga bag‘ishlangan tantanali marosimda ishtirok etdi va nutq so‘zladi. Bu haqda Zamin.uz xabar berdi.
Davlat rahbari o‘z nutqida mamlakatda iqtisodiyotning va aholi sonining tez sur’atlarda o‘sib borayotganini ta’kidlab, energetika tizimini zamonaviy talablarga moslashtirish va uni tubdan isloh qilish zarurligini qayd etdi. Prezident Shavkat Mirziyoyevning so‘zlariga ko‘ra, energetika sohasidagi islohotlar ikki asosiy maqsadga qaratilgan: birinchisi – mamlakatning barcha hudud va tarmoqlarini ishonchli va uzluksiz energiya bilan ta’minlash, ikkinchisi esa ushbu jarayonni ekologik toza va qayta tiklanuvchi energiya manbalari hisobidan amalga oshirishdir.
Shuningdek, davlat rahbari so‘nggi yillarda energetika sohasiga 35 milliard dollar miqdorida xorijiy investitsiya jalb qilinganini ta’kidladi. Ushbu mablag‘lar hisobiga 9 ming megavatt quvvatga ega yangi energetika obyektlari ishga tushirilgan.
Natijada, mamlakatda elektr energiyasi ishlab chiqarish hajmi 2017-yildagi 60 milliard kilovatt-soatdan 2023-yilda 85 milliard kilovatt-soatga yetgan. Prezident qayta tiklanuvchi energiya manbalarini rivojlantirish ustuvor yo‘nalish ekanini alohida ta’kidladi.
Ma’lum qilinishicha, so‘nggi yillarda salkam 5 ming megavatt quvvatga ega quyosh va shamol elektr stansiyalari, shuningdek, 400 megavatt quvvatga ega gidroelektr stansiyalari ishga tushirilgan. Yil yakuniga qadar mamlakatda “yashil” energiyaning umumiy ulushi 30 foizga yetkazilishi rejalashtirilgan.
Davlat rahbari nutqi davomida yangi energetika quvvatlarini yaratish, xorijiy sheriklar bilan qo‘shma loyihalarni amalga oshirish va “yashil” texnologiyalar ulushini oshirish bo‘yicha kelgusi rejalarni ham e’lon qildi.
