8–10 dekabrda sovuq havo va kuchli shamol kutilmoqda

O‘zgidromet xizmati 8–10 dekabr kunlari uchun ob-havo bo‘yicha ogohlantirish berdi. Bu haqda Zamin.uz xabar berdi.

Ma’lumotlarga ko‘ra, ushbu kunlarda mamlakat hududiga sovuq va nam havo oqimi kirib kelishi kutilmoqda. Ayrim hududlarda yomg‘ir yog‘ishi, tog‘oldi va tog‘li hududlarda esa yomg‘ir va qor aralash yog‘ingarchilik kuzatilishi mumkin.

9–10 dekabr kunlari shimoliy va cho‘l hududlarida shamol tezligi 15–18 metr/sekundgacha kuchayishi, ba’zi joylarda esa 20–22 metr/sekundgacha yetishi ehtimoli mavjud. Haroratning sezilarli darajada pasayishi ham prognoz qilinmoqda.

Xususan, 10 dekabrdan boshlab markaziy viloyatlarda kechalari harorat 2–5 daraja sovuq, kunduzi esa 3–6 daraja iliq bo‘lishi kutilmoqda. Shimoliy hududlarda kechalari harorat 7–10 darajagacha sovuq, kunduzi esa 0–3 daraja sovuq atrofida bo‘lishi mumkin.

Mutaxassislar havo sharoitidagi keskin o‘zgarishlarga tayyor bo‘lishni va xavfsizlik choralariga amal qilishni tavsiya etadi.