Tog‘larda qor ko‘chishi xavfi: ehtiyot bo‘ling!
O‘zbekiston Respublikasi Gidrometeorologiya xizmati markazi (O‘zgidromet) 6–9 dekabr kunlari Toshkent va Namangan viloyatlarida qor ko‘chishi ehtimoli yuqori ekanini ma’lum qildi. Bu haqda Zamin.uz xabar berdi.
Ushbu xavf kutilayotgan yog‘ingarchilik va haroratning keskin o‘zgarishi bilan bog‘liq. Tog‘li hududlarda xavf darajasining oshgani qayd etilmoqda.
Xususan, Toshkent viloyatining Bo‘stonliq, Ohangaron, Parkent tumanlarining Chotqol tizmasi tog‘ qismi va Namangan viloyatining Pop tumani hududlarida qor ko‘chishi xavfi mavjud. Mutaxassislar ushbu hududlarda yashovchi aholi, dam oluvchilar hamda ushbu yo‘nalishlarda harakatlanayotgan haydovchilardan ehtiyotkor bo‘lishni so‘ramoqda.
Havo sharoitining tez o‘zgarishi sababli, barcha ogohlantirish va ko‘rsatmalarga rioya qilish tavsiya etiladi. Tog‘li hududlarga safar qilishni rejalashtirayotgan fuqarolarga xavfsizlik choralariga qat’iy amal qilish va ob-havo haqidagi yangiliklarni kuzatib borish tavsiya etiladi.
