8–10-dekabr: O‘zbekistonda sovuq va yog‘ingarchilik kutilmoqda
O‘zbekiston Gidrometeorologiya xizmati (O‘zgidromet) 8–10-dekabr kunlari mamlakat bo‘ylab keskin sovuq havo va yog‘ingarchilik kutilayotgani haqida ogohlantirdi. Bu haqda Zamin.uz xabar berdi.
Mutaxassislarning ma’lumotiga ko‘ra, ushbu kunlarda mamlakat hududiga nam va sovuq havo oqimi kirib keladi, natijada ob-havo sharoiti sezilarli darajada o‘zgaradi. 8–9-dekabr kunlari respublikaning ayrim hududlarida yomg‘ir yog‘ishi kutilmoqda.
Havo harorati pasayishi va namlikning ortishi sababli ba’zi joylarda yog‘ingarchilik kuchayishi mumkin. Tog‘oldi va tog‘li hududlarda esa 8–10-dekabr kunlari yog‘ingarchilik o‘zgaruvchan bo‘lib, yomg‘ir va qor bir-birini almashib turadi.
Ayrim vaqtlarda kuchli yog‘ingarchilik ham kuzatilishi ehtimol qilinmoqda. Shu bois mutaxassislar aholini ehtiyotkor bo‘lishga, tog‘ yo‘llarida harakat qiluvchi haydovchilarni esa sergaklikka chaqirmoqda.
9–10-dekabr kunlari shimoliy hududlar va cho‘l mintaqalarida shamolning tezligi 15–18 m/s gacha yetishi, ba’zi joylarda qisqa muddatda 20–22 m/s gacha kuchayishi mumkin. Bu holat ayrim hududlarda chang ko‘tarilishi va ko‘rinuvchanlikning pasayishiga olib kelishi, shuningdek, transport harakatida noqulayliklar yuzaga keltirishi mumkin.
Harorat o‘zgarishlari ham kuzatilmoqda. 10-dekabrga kelib markaziy hududlarda kechasi havo harorati 2–5 daraja sovuq, kunduzi esa 3–6 daraja iliq bo‘ladi.
Shimoliy viloyatlarda esa sovuq kuchliroq bo‘lib, tunlari harorat 7–10 daraja sovuqqacha, kunduzi esa 0–3 daraja sovuq bo‘lishi kutilmoqda. O‘zgidromet aholini ob-havo sharoitlarining keskin o‘zgarishiga tayyor turishga, yo‘l harakatida va ochiq maydonlarda xavfsizlik qoidalariga qat’iy rioya qilishga chaqirdi.
