O‘zbekiston va Janubiy Koreya hamkorligi kengaymoqda
O‘zbekiston bosh vaziri o‘rinbosari Jamshid Xo‘jayev Janubiy Koreya kompaniyalari bilan hamkorlikni rivojlantirish bo‘yicha o‘z fikrlarini bildirdi. Bu haqda Zamin.uz xabar berdi.
Yonhap axborot agentligi xabariga ko‘ra, Xo‘jayev ushbu bayonotlarini Janubiy Koreyaga xizmat safari davomida aytgan. U ikki davlat o‘rtasidagi hamkorlikni qayta tiklanuvchi energiya manbalari, infratuzilma, transport va axborot texnologiyalari sohalarida yanada kengaytirish rejalashtirilayotganini ta’kidladi.
Hozirgi kunda O‘zbekistonda 680 dan ortiq o‘zbek-koreys qo‘shma korxonalari faoliyat yuritmoqda. So‘nggi sakkiz yil davomida mamlakatda amalga oshirilgan islohotlar tufayli iqtisodiyot ikki barobar o‘sgan.
Janubiy Koreya Toshkent shahrida yangi xalqaro aeroport qurilishida ham ishtirok etadi. Ushbu loyiha 2029 yilda yakunlanib, foydalanishga topshirilishi rejalashtirilgan.
Bundan tashqari, Hyundai Rotem kompaniyasi O‘zbekistonga 198 million dollarlik yuqori tezlikdagi poyezdlarni yetkazib beradi. Shuningdek, o‘zbekistonlik mutaxassislarni bu poyezdlarni boshqarish va ta’mirlash bo‘yicha o‘qitish ishlari ham amalga oshiriladi.
Ikki davlat o‘rtasidagi savdo aloqalari ham rivojlanmoqda. 2025 yil boshiga kelib, o‘zaro savdo hajmi 1,4 milliard AQSh dollaridan oshdi.
Janubiy Koreya bugungi kunda O‘zbekistonning asosiy beshta savdo hamkoridan biri hisoblanadi.
