O‘zbekiston Respublikasi Gidrometeorologiya xizmati markazi (O‘zgidromet) 10–12 dekabr kunlari ob-havo sharoitlari bilan bog‘liq xavf haqida ogohlantirish berdi. Bu haqda Zamin.uz xabar berdi.
Ta’kidlanishicha, ushbu kunlarda kuchli yog‘ingarchilik va haroratning keskin o‘zgarishi sababli tog‘li hududlarda qor ko‘chishi xavfi oshadi. Xususan, Toshkent viloyati Bo‘stonliq, Ohangaron va Parkent tumanlaridagi Chotqol tog‘ tizmalarida, shuningdek, Namangan viloyati Pop tumanida xavf darajasi yuqori ekani qayd etilgan.
Ushbu hududlarda yashovchi aholiga, dam olish maskanlariga borishni rejalashtirayotgan fuqarolarga va shu yo‘nalishlarda harakatlanayotgan haydovchilarga ehtiyotkorlik choralarini ko‘rish tavsiya etiladi. Mutaxassislarning so‘zlariga ko‘ra, hozirgi ob-havo sharoitida har qanday e’tiborsizlik jiddiy oqibatlarga olib kelishi mumkin.
Shu sababli, fuqarolardan xavfsizlik qoidalariga rioya qilish va zarurat bo‘lmaganda xavfli hududlarga bormaslik so‘ralmoqda. Ma’lumotlarni manba: O‘zgidromet.
