8-dekabr kuni Toshkent xalqaro aeroportida muhim yuk operatsiyasi amalga oshirildi. Bu haqda Zamin.uz xabar berdi.
Uzbekistan Airports ma’lumotiga ko‘ra, mahalliy vaqt bilan soat 01:15 da Air Atlanta Icelandic aviakompaniyasining Boeing 747-400 samolyoti Belgiya davlatining Lej shahridan tirik qoramol olib keldi. Yukning og‘irligi 93 tonnani tashkil etdi.
Keltirilgan chorva mollari Germaniya va Avstriyadan olib kelingan Simmental va Golshtin zotlariga mansub bo‘lib, yuqori mahsuldorligi, sifatli sut va go‘sht mahsulotlari berishi bilan tanilgan. Chorva mollarini tushirish va qabul qilish jarayonlari veterinariya talablariga to‘liq muvofiq holda amalga oshirildi.
Mamlakatimizda nasldor chorva importini rag‘batlantirishga oid chora-tadbirlar davom etmoqda. Xususan, subsidiya berish muddati 2030-yilgacha uzaytiriladi.
2026-yildan boshlab, bir kunlik jo‘jalar importi bo‘yicha imtiyozlar faqat mahalliy ishlab chiqaruvchilar mahsulotlarini xarid qilishga qaratiladi. Bundan tashqari, 2027-yil oxirigacha tirik qoramol, qo‘y va echkilarni import qilayotgan tadbirkorlar uchun QQS to‘lovini 180 kunga kechiktirish va qaytarib olish imkoniyati yaratiladi.
Shu bilan birga, 2026-yildan boshlab veterinariya ruxsatnomalarini tekshirish muddatlari ikki barobar qisqaradi. Chorvachilik sohasida tadbirkorlar uchun qo‘shimcha qulayliklar ham joriy etilmoqda.
Xususan, ozuqabop ekinlar yetishtirish uchun yer uchastkalarini elektron auksion orqali olish va to‘lovni 5 yil davomida bo‘lib-bo‘lib amalga oshirish imkoniyati beriladi. Manba: one.uz
