O‘zbekistonga birinchi tezyurar poyezd jo‘natildi
Hyundai Rotem kompaniyasi O‘zbekistonga birinchi tezyurar poyezdni jo‘natdi. Bu haqda Zamin.uz xabar berdi.
Ushbu poyezdni yuklash marosimi 10 dekabr kuni Janubiy Koreyaning Masan portida o‘tkazildi. Tadbirda O‘zbekiston bosh vaziri o‘rinbosari Jamshid Xo‘jayev va Janubiy Koreya kompaniyasi rahbariyati ishtirok etdi.
Bu haqda ChosunBiz axborot manbasi xabar berdi. Ushbu birinchi partiya yetti vagondan iborat bo‘lib, shartnoma imzolangandan so‘ng bir yil va besh oy ichida ishlab chiqarildi.
Rejaga ko‘ra, poyezdlar 2026 yilning yanvar yoki fevral oylarida O‘zbekistonga yetkazib beriladi. Bu dastlab belgilangan muddatdan bir-ikki oy tezroq amalga oshishi kutilmoqda.
Qolgan 35 vagon (beshta poyezd) esa 2027 yil oxirigacha yetkazib berilishi rejalashtirilgan. Mazkur poyezdlar O‘zbekistonning iqlim sharoitlariga moslashtirilgan.
Ular changga chidamli bo‘lib, yuqori harorat va qum bo‘ronlari sharoitida ham ishlay oladi. Yangi vagonlar uzunligi 1,2 ming kilometrdan oshadigan yo‘nalishlarda, jumladan, Toshkent va Buxoro o‘rtasida qatnov uchun mo‘ljallangan.
Bu loyiha mamlakat transport tizimini rivojlantirishda muhim qadam bo‘lishi kutilmoqda.
