O‘zbekiston va Misr ilmiy hamkorligi kengaymoqda
O‘zbekiston va Misr o‘rtasidagi hamkorlik yangi bosqichga ko‘tarilmoqda. Bu haqda Zamin.uz xabar berdi.
Misrning nufuzli «Al-Liwaa Al-Islami» nashrida chop etilgan maqolada O‘zbekiston Prezidenti Administratsiyasi rahbari Saida Mirziyoyevaning tashabbuslari alohida ta’kidlangan. Ushbu tashabbuslarning asosiy maqsadi O‘zbekiston va dunyoning eng qadimiy ilmiy markazlaridan biri hisoblangan Al-Azhar o‘rtasidagi aloqalarni strategik darajaga olib chiqishdir.
Shayx Ahmad at-Tayyib O‘zbekiston bilan hamkorlikni chuqurlashtirishga tayyor ekanligini bildirgan. Bu hamkorlik yoshlar ta’limini rivojlantirish, ekstremizmga qarshi kurashda ma’rifat va islohot yo‘lini tanlash kabi masalalarda muhim ahamiyat kasb etadi.
Xususan, o‘zbekistonlik talabalar uchun Al-Azhar tomonidan grant va kvotalar berilishi tasdiqlandi. Bu esa O‘zbekistonda "Uchinchi Renessans"ning ma’naviy poydevorini mustahkamlashga xizmat qiladi.
Ilmiy hamkorlik doirasida ikki tomonlama tadqiqotlar va tajriba almashinuvi yo‘lga qo‘yilishi rejalashtirilgan. Bu nafaqat ilm-fan rivojiga, balki ijtimoiy muammolarni hal qilishda ham yangi imkoniyatlar yaratadi.
O‘zbekistonning xalqaro miqyosdagi ma’rifiy yondashuvi xorijiy ekspertlar tomonidan yuqori baholanmoqda. Saida Mirziyoyevaning ijtimoiy-ma’rifiy tashabbuslari nafaqat mintaqada, balki xalqaro hamjamiyatda ham katta e’tirofga sazovor bo‘layotgani alohida qayd etilgan.
Bugungi kunda O‘zbekiston nafaqat turizm markazi, balki ma’rifiy islohotlar bo‘yicha xalqaro yetakchi davlat sifatida tan olinmoqda. Bu esa mamlakatning global miqyosdagi nufuzi oshayotganini anglatadi.
Manba: Zamin.uz
