O‘zbekistonga yangi tezyurar poyezdlar jo‘natildi
Janubiy Koreyaning Changvon shahrida joylashgan Masan portida O‘zbekiston uchun maxsus ishlab chiqarilgan Hyundai Rotem yuqori tezlikdagi poyezdlarining birinchi partiyasi rasman jo‘natildi. Bu haqda Zamin.uz xabar berdi.
Ushbu marosimda O‘zbekiston Bosh vaziri o‘rinbosari Jamshid Xodjayev boshchiligidagi delegatsiya, Koreya hukumati vakillari hamda Hyundai Rotem kompaniyasi rahbarlari ishtirok etdi. Yangi tezyurar poyezdlarga “Jaloliddin Manguberdi” nomi berilgan bo‘lib, ular Toshkent — Urganch — Xiva yo‘nalishida harakatlanadi.
Mazkur yo‘nalish bo‘ylab qatnovlar yo‘lga qo‘yilgach, taxminan 1000 kilometr masofani atigi 7 soat ichida bosib o‘tish imkoniyati yaratiladi. Bu poyezdlar O‘zbekiston temir yo‘llari va Hyundai Rotem o‘rtasida 2024-yil iyun oyida imzolangan shartnoma asosida ishlab chiqarilgan.
Ushbu loyiha O‘zbekistonning yuqori tezlikdagi temir yo‘l transportini rivojlantirishga qaratilgan dastlabki qadam bo‘lib, kelgusida yana 5 ta shunday poyezd xarid qilinishi rejalashtirilgan. Mazkur loyiha ikki mamlakat o‘rtasidagi transport sohasidagi hamkorlikni mustahkamlash, temir yo‘l tizimini zamonaviylashtirish va yuqori tezlikdagi qatnovlarni yo‘lga qo‘yishda muhim ahamiyat kasb etadi.
