O‘zbekistonda korrupsiyaga qarshi yangi markaz tashkil etiladi
O‘zbekistonda korrupsiyaga qarshi kurashish bo‘yicha yangi markaz tashkil etilishi rejalashtirilmoqda. Bu haqda Zamin.uz xabar berdi.
Bu haqda Prezident Shavkat Mirziyoyevga korrupsiyaga qarshi kurashish, raqamlashtirish va komplaens-nazoratni rivojlantirish masalalari yuzasidan taqdimot davomida ma’lum qilindi. Ushbu markaz korrupsiyani oldindan aniqlash uchun xavf tahlili bo‘yicha ishlaydi.
Shuningdek, davlat va jamoat tashkilotlarini birlashtiruvchi korrupsiyaga qarshi kurash klasterini tashkil etish taklif qilindi. Bu tizim doirasida komplaens-nazorat bo‘limlarini to‘liq raqamlashtirish va sun’iy intellekt texnologiyalaridan foydalanish orqali korrupsiya xavfini avtomatik aniqlash imkoniyati yaratiladi.
Taqdimot davomida korrupsiyaning oldini olishga alohida e’tibor qaratilishi ta’kidlandi. Shu maqsadda, huquqbuzarliklarning sabablarini bartaraf etish uchun maxsus loyihaviy ofislar tashkil etiladi.
Fuqarolarni investitsiyalar va qurilish jarayonlarini nazorat qilishga jalb etish ham rejalashtirilgan. Bunga qo‘shimcha ravishda, korrupsiya holatlari haqida xabar bergan shaxslarni rag‘batlantirish tizimi ham ishlab chiqiladi.
Ular ko‘krak nishoni va maxsus himoya orderi bilan taqdirlanadi. Mazkur tashabbuslar korrupsiyaga qarshi kurashish tizimini mustahkamlash va jamiyatda shaffoflikni oshirishga qaratilgan.
Manba: zamin.uz
