O‘zbekiston xalqaro mehmonxona tarmoqlarida yetakchiga aylanmoqda
O‘zbekiston Markaziy Osiyoda xalqaro mehmonxonalar tarmog‘ining eng tez rivojlanayotgan bozori sifatida o‘z mavqeini mustahkamlamoqda. Bu haqda Zamin.uz xabar berdi.
2020 yildan 2025 yilgacha mamlakatda xalqaro brendlarga tegishli mehmonxona xonalari soni 272 foizga oshgan. Bu ko‘rsatkich boshqa mintaqa davlatlari orasida eng yuqori o‘sish sur’ati hisoblanadi.
Ushbu ma’lumot CMWP Uzbekistan tadqiqotida keltirilgan. 2025 yil yakunlari bo‘yicha O‘zbekistonda 682 ta yangi brendli mehmonxona xonasi foydalanishga topshirildi.
Yilning muhim ochilishlari qatoriga Swissôtel Tashkent, Wyndham Garden Tashkent Airport, Rama Encore by Wyndham Zomin va J.W. Marriott Hotel Tashkent kiradi.
Ayniqsa, J.W. Marriott Hotel Tashkent mamlakatdagi ikkinchi Luxury darajadagi obyekt sifatida e’tiborga loyiqdir.
2025 yilga kelib, O‘zbekistondagi xalqaro mehmonxona tarmoqlariga tegishli xonalar soni 4 473 taga yetdi. Markaziy Osiyoda xalqaro mehmonxona xonalari soni bo‘yicha O‘zbekiston Qozog‘istondan keyingi ikkinchi o‘rinni egallaydi.
Biroq o‘sish sur’atlari bo‘yicha mamlakat birinchi o‘rinda. 2025 yil holatiga ko‘ra, mintaqada xalqaro tarmoqlarning umumiy mehmonxona xonalari soni 12 743 tani tashkil etadi.
Ulardan 57 foizi Qozog‘istonga, 35 foizi esa O‘zbekistonga to‘g‘ri keladi. O‘zbekistonda mehmonxona fondi besh yil ichida deyarli to‘rt barobarga oshgan bo‘lsa, Qozog‘istonda bu ko‘rsatkich 52 foizni tashkil etgan.
Prognozlarga ko‘ra, 2026 yil oxiriga kelib, O‘zbekiston xalqaro mehmonxona xonalari hajmi bo‘yicha Qozog‘istonni ortda qoldirib, mintaqada birinchi o‘ringa chiqadi. Bu ko‘rsatkich 8 mingdan oshiq xonani tashkil etadi, Qozog‘istonda esa taxminan 7,2 ming xona bo‘lishi kutilmoqda.
Uzoq muddatda o‘sish yanada yuqori bo‘lishi kutilmoqda. 2025–2030 yillar davomida O‘zbekistonda xalqaro mehmonxona fondi 10 311 taga yetib, 5 835 ta yangi xona qo‘shiladi.
Bu 130 foizlik o‘sishni anglatadi. Mamlakat xalqaro mehmonxona operatorlari uchun tobora muhim ahamiyat kasb etmoqda.
2030 yilga kelib, O‘zbekiston mintaqaviy mehmonxona fondining 47 foizini nazorat qilar ekan, sohaning kelgusi rivojlanishida yetakchi o‘rinni egallashi kutilmoqda.
