O‘zbekiston Yevroosiyoda investitsiya jalb qilishda yetakchi bo‘ldi
O‘zbekiston Yevroosiyo mintaqasida investitsiyalarni qabul qilish bo‘yicha yetakchi davlatga aylandi. Bu haqda Zamin.uz xabar berdi.
Yevroosiyo taraqqiyot banki ma’lumotlariga ko‘ra, mamlakatga jalb qilingan investitsiyalar hajmi 10,7 milliard AQSh dollaridan oshgan bo‘lib, bu mintaqaning umumiy ko‘rsatkichining 22 foizini tashkil etadi. Shu bilan birga, O‘zbekiston xorijga investitsiya kiritishda ham faol ishtirok etmoqda.
2022-yilga nisbatan mamlakatning kapital eksporti ikki barobarga oshib, 396 million AQSh dollariga yetgan. Bu mablag‘larning katta qismi mintaqadagi boshqa davlatlarning qayta ishlash sanoatiga yo‘naltirilgan.
Umuman olganda, Yevroosiyo davlatlari o‘rtasidagi o‘zaro investitsiyalar hajmi rekord darajaga – 48,4 milliard AQSh dollariga yetdi. Jahon bo‘yicha to‘g‘ridan-to‘g‘ri investitsiyalar oqimi pasayayotganiga qaramay, Yevroosiyo mintaqasida bu ko‘rsatkich o‘sishda davom etmoqda.
O‘sishning asosiy omili xususiy biznes bo‘lib, ushbu soha barcha investitsiyalarning 72 foizini yoki 34,7 milliard AQSh dollarini tashkil qilmoqda. Mintaqa xomashyo resurslariga qaramlikdan asta-sekin chiqib bormoqda.
Tog‘-kon sanoatiga yo‘naltirilgan investitsiyalar qisqarayotgan bir paytda ishlab chiqarish, moliya va qurilish sohalariga kiritilayotgan mablag‘lar ortmoqda. So‘nggi bir yarim yil ichida qayta ishlash sanoatiga yo‘naltirilgan investitsiyalar hajmi 1,5 milliard AQSh dollariga oshgan.
Markaziy Osiyo alohida ajralib turib, bu hududda mintaqaviy investitsiyalar hajmi 1,3 milliard AQSh dollariga yetgan va bu ko‘rsatkich o‘tgan yilga nisbatan 42 foizga o‘sgan. Mablag‘larning taxminan 80 foizi qurilish, sanoat va moliya sohalariga yo‘naltirilgan.
Qozog‘iston mintaqaning asosiy iqtisodiy o‘yinchilaridan biri bo‘lib, u O‘zbekistonga faol ravishda investitsiya kiritmoqda. So‘nggi bir yarim yil ichida Qozog‘istonning O‘zbekistonga yo‘naltirgan investitsiyalari hajmi 60 foizga oshgan.
Manba: one.uz
