Mo‘ynoqda yangi gaz koni kashf etildi
Qoraqalpog‘istonning Mo‘ynoq tumanida joylashgan 2-son izlov-qidiruv qudug‘idan yuqori bosimli va sanoat darajasida qazib olinadigan tabiiy gaz oqimi kashf etildi. Bu haqda Zamin.uz xabar berdi.
Bu haqda “O‘zbekneftgaz” aksiyadorlik jamiyati matbuot xizmati xabar berdi. Ma’lum qilinishicha, “O‘zbekneftgaz” tarkibidagi “O‘zneftgaz burg‘ilash ishlari” mas’uliyati cheklangan jamiyati tomonidan quduqni burg‘ilash ishlari olib borilgan.
Tajribali mahalliy mutaxassislar zamonaviy xorijiy texnologiyalarni qo‘llagan holda, ushbu quduqni 90 kun ichida burg‘ilashga muvaffaq bo‘lishgan. Quduqning umumiy chuqurligi 5 ming metrni tashkil etadi.
Hozirda mazkur quduqdan kuniga 2,4 million kub metr tabiiy gaz olinmoqda. Ayni vaqtda ushbu hududdagi boshqa istiqbolli chuqur quduqlarda ham izchil burg‘ilash ishlari davom ettirilmoqda.
Mutaxassislar yil oxiriga qadar mazkur quduqlardan ham yuqori bosimli gaz oqimi olinishi mumkinligini taxmin qilmoqda. Ushbu kashfiyot mamlakatning energetika sohasidagi salohiyatini oshirishga xizmat qiladi.
