Tog‘larda qor ko‘chishi xavfi e’lon qilindi
O‘zgidromet xizmati 13–16-dekabr kunlari ob-havo sharoitlari keskin o‘zgarishi mumkinligi haqida ogohlantirdi. Bu haqda Zamin.uz xabar berdi.
Xususan, ushbu kunlarda yog‘ingarchilikning kuchayishi va haroratning pasayishi sababli respublikaning tog‘li hududlarida qor ko‘chish xavfi mavjud. Toshkent viloyatining Bo‘stonliq, Ohangaron va Parkent tumanlaridagi Chotqol tizmasi tog‘lari hamda Namangan viloyati Pop tumanida ushbu xavf ko‘proq kuzatilishi mumkin.
Shu sababli tog‘li hududlarda yashovchi aholi, ushbu hududlarga tashrif buyuruvchi sayyohlar va haydovchilarga ehtiyot bo‘lish, xavfsizlik choralarini ko‘rish tavsiya etiladi. Mutaxassislar fuqarolarni mazkur hududlarda harakatlanishda hushyorlikni oshirishga chaqirmoqda.
Ayniqsa, qor ko‘chish xavfi yuqori bo‘lgan joylarga bormaslik, transport vositalarini tog‘ yo‘llarida ehtiyotkorlik bilan boshqarish lozim. Shu orqali noxush hodisalarning oldini olishga yordam beriladi.
Ma’lumot O‘zgidromet xizmati tomonidan taqdim etilgan.
