Shavkat Mirziyoyevning Ashxobod tashrifi muvaffaqiyatli yakunlandi
O‘zbekiston Respublikasi Prezidenti Shavkat Mirziyoyevning Turkmaniston poytaxti Ashxobod shahriga amalga oshirgan amaliy tashrifi muvaffaqiyatli yakunlandi. Bu haqda Zamin.uz xabar berdi.
Tashrif davomida davlatimiz rahbari bir qator muhim tadbirlarda ishtirok etdi. Prezident Shavkat Mirziyoyev Turkmanistonning doimiy betarafligining 30 yilligi, Xalqaro betaraflik kuni va 2025-yil “Xalqaro tinchlik va ishonch yili”ga bag‘ishlangan xalqaro forumda qatnashdi va o‘z nutqini so‘zladi.
Ushbu tadbir davomida xalqaro hamkorlikni mustahkamlash va tinchlikka erishish yo‘lidagi sa’y-harakatlar muhokama qilindi. Shuningdek, davlatimiz rahbari Turkmanistonning milliy yetakchisi, Xalq Maslahati Raisi Gurbanguli Berdimuhamedov hamda Prezident Serdar Berdimuhamedov bilan uchrashuvlar o‘tkazdi.
Muzokaralar davomida ikki mamlakat o‘rtasidagi do‘stlik va hamkorlik aloqalarini yanada rivojlantirish masalalari muhokama qilindi. Delegatsiya vakillari Ashxoboddagi yangilangan Betaraflik majmuasini ham ziyorat qildi.
Tashrif yakunida Shavkat Mirziyoyev Ashxobod xalqaro aeroportida Turkmaniston Vazirlar Mahkamasi Raisining o‘rinbosari Xojamirat Geldimiradov va boshqa rasmiy shaxslar tomonidan kuzatildi. Prezident Toshkent shahriga qaytib keldi.
