Tog‘larda qor ko‘chishi xavfi: ogoh bo‘ling!
O‘zgidromet Toshkent va Namangan viloyatlarining tog‘li hududlarida qor ko‘chishi xavfi haqida ogohlantirish berdi. Bu haqda Zamin.uz xabar berdi.
Ma’lum qilinishicha, 13-16 dekabr kunlari kutilayotgan yog‘ingarchilik va havo haroratining keskin o‘zgarishi natijasida ushbu hududlarda xavfli vaziyatlar yuzaga kelishi mumkin. Xususan, Toshkent viloyatining Bo‘stonliq, Ohangaron va Parkent tumanlaridagi Chotqol tizmasi hamda Namangan viloyatining Pop tumani hududlarida qor ko‘chishi ehtimoli mavjud.
Mutasaddilar tog‘li hududlarda yashovchi aholiga, dam oluvchilarga va ushbu yo‘nalishlarda harakatlanayotgan haydovchilarga alohida ehtiyotkorlik choralarini ko‘rishni tavsiya qilmoqda. Qor ko‘chish xavfini inobatga olib, muhim safarlarni vaqtincha kechiktirish yoki zarurat bo‘lmaganda bunday hududlarga bormaslik maqsadga muvofiqdir.
Manba: O‘zgidromet.
