O‘zgidromet xizmati 12-15-dekabr kunlari O‘zbekiston hududida ob-havo o‘zgarishi kutilayotganini ma’lum qildi. Bu haqda Zamin.uz xabar berdi.
Shu kunlarda respublikaning ko‘plab hududlarida yog‘ingarchilik bo‘lishi, ayrim joylarda esa qor yog‘ishi ehtimoli bor. Havo harorati ham keskin o‘zgarishi mumkin.
Qoraqalpog‘iston va Xorazm viloyatlarida 14-dekabr kuni yomg‘ir yog‘ib, keyinchalik qor yog‘ishi kutilmoqda. Ushbu hududlarda harorat 2 daraja sovuqdan 8 daraja iliqqacha o‘zgarishi mumkin.
Buxoro, Navoiy, Toshkent, Samarqand va Jizzax viloyatlarida yomg‘ir yog‘ishi, ayrim joylarda esa tuman kuzatilishi mumkin. Kechasi harorat 2-7 daraja iliq bo‘lsa, kunduz kunlari 5-10 daraja iliq bo‘lishi kutilmoqda.
Qashqadaryo va Surxondaryo viloyatlarida ham yomg‘ir yog‘ishi va tuman tushishi ehtimoli mavjud. Ushbu hududlarda kechasi harorat 2-7 daraja iliq, kunduzi esa 10-15 daraja iliq bo‘ladi.
Andijon, Namangan va Farg‘ona viloyatlarida yomg‘ir yog‘ishi kutilmayapti, biroq tuman kuzatilishi mumkin. Bu hududlarda kechasi harorat 0-5 daraja iliq, kunduzi esa 5-10 daraja iliq bo‘ladi.
Tog‘li hududlarda yog‘ingarchilik va qor yog‘ishi ehtimoli bor. Ayniqsa, 14-15-dekabr kunlari ayrim joylarda kuchli qor yog‘ishi mumkin.
Shuningdek, bu hududlarda tuman tushishi va shamolning 7-12 m/s tezlikda esishi kutilmoqda. Manba: O‘zgidromet.
