Toshkentda Yangi yil uchun transport cheklovlari joriy etiladi
Yangi yil bayrami yaqinlashgani sababli Toshkent shahrida bir qator hududlarda transport harakati vaqtincha cheklanadi. Bu haqda Zamin.uz xabar berdi.
Bu cheklovlar bayram tadbirlarini yuqori saviyada tashkil etish, aholining xavfsizligini ta’minlash va jamoat tartibini mustahkamlash maqsadida joriy etiladi. Toshkent shahar hokimligi matbuot xizmatining xabariga ko‘ra, cheklovlar 2025-yil 15-dekabrdan 2026-yil 15-yanvarigacha amal qiladi.
Ushbu muddat davomida O‘zbekiston Milliy kutubxonasi oldidagi maydon atrofidagi quyidagi yo‘nalishlarda harakat to‘xtatiladi: - Zarafshon ko‘chasining “Hyatt Regency Tashkent” mehmonxonasi qo‘riqlash punkti va Matbuotchilar ko‘chalari oralig‘i; - Istiqlol ko‘chasining Amir Temur shoh ko‘chasi va Buyuk Turon ko‘chalari oralig‘i; - Buyuk Turon ko‘chasining Istiqlol ko‘chasi kesishmasidan Yoshlar ijod saroyigacha bo‘lgan qismi. Bundan tashqari, 2025-yil 17-dekabrdan 2026-yil 5-yanvargacha Taras Shevchenko gastronomik-turizm ko‘chasida ham transport harakati cheklanadi.
Ushbu hududlar quyidagicha: - Taras Shevchenko ko‘chasi Fidokor ko‘chasidan Nukus ko‘chasigacha; - Sayyid Baraka ko‘chasi Oybek ko‘chasidan Amir Temur shoh ko‘chasigacha. Shahar hokimligi ushbu vaqtinchalik noqulayliklar uchun aholiga uzr bildirib, haydovchilarga o‘z marshrutlarini oldindan rejalashtirishni tavsiya etadi.
Manba: Toshkent shahar hokimligi matbuot xizmati.
