Toshkent ekologiyasini yaxshilash bo‘yicha keng ko‘lamli rejalar belgilandi
Prezident Shavkat Mirziyoyev Toshkent shahrida ekologiyani yaxshilash bo‘yicha olib borilayotgan ishlar va kelgusi rejalarga bag‘ishlangan yig‘ilishda poytaxtning dolzarb masalalarini muhokama qildi. Bu haqda Zamin.uz xabar berdi.
Unga ko‘ra, Toshkent shahri ekologiyasi barqaror bo‘lgan 300 ta shahar qatoriga kirishi uchun mutasaddilar tinimsiz ishlashi lozimligi ta’kidlandi. Bugungi kunda Toshkentda ekologiya masalasi jiddiy ahamiyatga ega.
Oxford Economics tomonidan e’lon qilingan “Global shaharlar indeksi” reytingida poytaxtimiz 471-o‘rinni egallagan. Prezident bu ko‘rsatkichni yaxshilash, Toshkentni ekologik barqaror shaharlardan biriga aylantirishni asosiy vazifa sifatida belgiladi.
Kelgusi uch oyda shahar bo‘ylab 4 ta sun’iy ko‘l va havzalar qurilishi rejalashtirilmoqda. 1 iyungacha har bir tumanda soyali sayr ko‘chalari tashkil etilib, har 10 ta mahallada bitta yashil bog‘ barpo etiladi.
2026 yilgacha esa 18,5 kilometr kanal qirg‘oqlari mustahkamlanib, bu hududlarda yangi yashil zonalar va sayilgohlar barpo qilinadi. Shuningdek, Bektemir, Sergeli va Yangihayot tumanlari bo‘ylab Chirchiq daryosining 16 kilometr qismini mustahkamlash orqali 800 gektar yangi hudud ochilishi, ulardan 200 gektarida yashil belbog‘lar, 250 gektarida esa ichki yo‘llar va piyoda yo‘laklari tashkil etilishi rejalashtirilgan.
Yig‘ilishda shahar drenaj tizimi bo‘yicha master-reja ishlab chiqilib, kelgusi yildan qurilish ishlari boshlanishi e’lon qilindi. Dastur doirasida 150 kilometr yopiq drenaj tizimi, 197 kilometr kanal va kollektorlarni ta’mirlash, 63 kilometr yangi kanallar qurish rejalashtirilgan.
Yomg‘ir suvini yig‘ish uchun 17 ta maxsus inshoot barpo qilinib, ushbu suv yashil hududlarni sug‘orishga yo‘naltiriladi. Shuningdek, shahar kommunal xizmatlari va favqulodda xizmatlar tun-u kun ishlashga o‘tadi.
Ular avariyaviy holatlarning oldini olish va ularni tezkorlik bilan bartaraf etish bo‘yicha faoliyatini kuchaytirishi lozim. Prezident barcha ushbu ishlar poytaxt aholisi uchun qulay va salqin mikroiqlim yaratishga xizmat qilishi kerakligini ta’kidladi.
Manba: Prezident matbuot xizmati.
