Shavkat Mirziyoyev Yaponiya imperatorini O‘zbekistonga taklif etdi
O‘zbekiston Prezidenti Shavkat Mirziyoyev Yaponiya imperatori Naruxitoni mamlakatimizga rasmiy tashrif bilan kelishga taklif etdi. Bu haqda Zamin.uz xabar berdi.
Bu haqda Prezident matbuot xizmati ma’lum qildi. Uchrashuv davomida Shavkat Mirziyoyev va imperator Naruxito ikki xalqning ma’naviy yaqinligiga e’tibor qaratdilar.
Ular o‘zaro mentalitet, urf-odatlar va oilaviy qadriyatlarning o‘xshashligini ta’kidladilar. Shuningdek, Prezident Mirziyoyev O‘zbekistonda amalga oshirilayotgan islohotlarni qo‘llab-quvvatlagani uchun imperatorga o‘z minnatdorligini bildirdi.
Toshkent va Tokio o‘rtasidagi madaniy hamda ta’lim sohasidagi hamkorlik masalalari ham muhokama qilindi. Ma’lumotlarga ko‘ra, joriy yilning dekabr holatiga ko‘ra, 3 mingdan ortiq o‘zbekistonlik Yaponiyada amaliyot o‘tagan, 440 dan ziyod talaba esa Yaponiya universitetlarida stipendiya asosida ta’lim olgan.
2026 yilda Yaponiyada O‘zbekiston madaniyati va tarixiga bag‘ishlangan ko‘rgazmalar tashkil etilishi rejalashtirilgan. Shuni ta’kidlash joizki, Naruxito Yaponiyaning 126-imperatori bo‘lib, 2019 yil may oyida taxtga o‘tirgan.
Uning hukmronlik davri «Reyva» — «Chiroyli uyg‘unlik» shiori ostida davom etmoqda. Imperator, shuningdek, suv yo‘llari tarixi va ekologiya, xususan suv va iqlim muammolari bo‘yicha mutaxassis sifatida tanilgan.
Manba: zamin.uz
