Samarqand va Nara o‘rtasida birodarlik aloqalari o‘rnatildi
O‘zbekiston Respublikasi Prezidenti Shavkat Mirziyoyev Yaponiyaga rasmiy tashrifi doirasida Nara shahri meri Gen Nakagava bilan uchrashdi. Bu haqda Zamin.uz xabar berdi.
Suhbat davomida hududlararo aloqalarni rivojlantirish va madaniy-gumanitar hamkorlik masalalari ko‘rib chiqildi. Samarqand va Nara shaharlari o‘rtasida birodarlik munosabatlari o‘rnatilgani alohida e’tirof etildi.
Tarixiy jihatdan Samarqand Buyuk Ipak yo‘lining markazi, Nara esa uning sharqiy darvozasi bo‘lgan. Ushbu shaharlar asrlar davomida xalqaro savdo va bilim almashinuvida muhim rol o‘ynab kelgan.
Nara shahri meri Gen Nakagava o‘z nutqida Nara shahridagi yangi bog‘lardan biriga Samarqand nomini berish qaroriga kelganini ma’lum qildi. Bu ikki xalq o‘rtasidagi do‘stlik va hamkorlik ramzi sifatida alohida ahamiyatga ega.
Shuningdek, savdo-iqtisodiy va investitsiya aloqalarini rivojlantirish, turizm, qishloq xo‘jaligi, transport, to‘qimachilik va shaharsozlik sohalarida qo‘shma loyihalarni amalga oshirish zarurligi qayd etildi. Prezident Mirziyoyevning Yaponiyaga tashrifi davomida Tokio shahrida Yaponiya imperatori Naruxito, parlament vakillari hamda iqtisodiyot vaziri bilan uchrashuvlar tashkil etildi.
Uchrashuvlarda strategik sheriklik munosabatlarini yanada mustahkamlash va qo‘shma loyihalarni ilgari surish masalalari muhokama qilindi.
