O‘zbekiston ilk sun’iy yo‘ldoshini uchirishga tayyorlanmoqda
O‘zbekiston tarixida ilk bor sun’iy yo‘ldosh va birinchi o‘zbek kosmonavtini fazoga uchirish bo‘yicha ishlar boshlandi. Bu haqda Zamin.uz xabar berdi.
Bu yangilikni Prezident Shavkat Mirziyoyev 26-dekabr kuni Oliy Majlis va xalqiga qilgan murojaatida e’lon qildi. Ushbu loyiha mamlakatimizning ilmiy va texnologik salohiyatini yuksaltirishga qaratilgan.
2030-yilga kelib, IT xizmatlari eksportini 5 milliard dollarga yetkazish maqsad qilingan. Shu bilan birga, kelgusi yilda Toshkent shahri, Buxoro, Farg‘ona va Toshkent viloyatida to‘rtta data-markaz, ikkita superkompyuter va 15 ta oliy ta’lim muassasasida sun’iy intellekt laboratoriyalari ishga tushiriladi.
Bu imkoniyatlar tibbiyot, transport, qishloq xo‘jaligi, geologiya, bank-moliya va jamoat xavfsizligi sohalarida sun’iy intellektni keng joriy etishga xizmat qiladi. Bugungi kunda minglab iqtidorli yoshlar IT va sun’iy intellekt sohalarida faoliyat olib bormoqda.
Ularning dron va robototexnika yo‘nalishidagi ishlanmalarini amaliyotga tatbiq etish maqsadida “Raqamli texnologiyalar markazi” tashkil etiladi. Ushbu markaz yosh mutaxassislar va olimlarni tayyorlashda muhim ahamiyat kasb etadi.
Shuningdek, “Samarqand-2028” sun’iy yo‘ldoshi Xitoyning STAR.VISION kompaniyasi bilan hamkorlikda fazoga uchiriladi. Bu loyiha doirasida ilmiy va texnologik integratsiyani kuchaytirish, universitetlar va kompaniyalar bilan hamkorlikni rivojlantirish bo‘yicha kelishuvlarga erishildi.
Mazkur tashabbuslar mamlakatning raqamli rivojlanish yo‘lidagi muhim qadamlardan biri sanaladi.
