O‘zbekistonda filtrsiz ishlaydigan ko‘mir qozonlari faoliyati to‘xtatiladi va ular Toshkent shahridan tashqariga ko‘chiriladi. Bu haqda Zamin.uz xabar berdi.
Bu haqda Prezident Shavkat Mirziyoyev Oliy Majlisga murojaatida ma’lum qildi. Ushbu chora atrof-muhitni muhofaza qilish va ekologik muammolarni kamaytirish maqsadida amalga oshiriladi.
Prezidentning ta’kidlashicha, hozirda Toshkent shahri va Toshkent viloyatida taxminan 2 mingta issiqxona ko‘mir va gaz yordamida isitiladi. Ushbu tizimni zamonaviylashtirish uchun kamida 200 gektar maydonni qamrab oluvchi agroklasterlar tashkil etilishi rejalashtirilgan.
Agroklasterlarga kiruvchi issiqxonalar davlatdan subsidiya olish imkoniyatiga ega bo‘ladi. Bu esa issiqxona xo‘jaliklarini energiya samaradorligini oshirishga rag‘batlantiradi.
Shuningdek, Prezident ekologik barqarorlikka alohida e’tibor qaratib, yashil energetika rivojlanishini qo‘llab-quvvatlashga urg‘u berdi. Yirik sanoat korxonalari uchun atmosferaga chiqindilarni kuzatish, filtrlar o‘rnatish va tozalash inshootlarini barpo etish maqsadida 100 million dollarlik kredit liniyasi ajratilishi rejalashtirilgan.
Ushbu chora-tadbirlar ekologik holatni yaxshilash va resurslardan oqilona foydalanishni ta’minlashga qaratilgan. Manba: zamin.uz
