"O‘zbekiston – 2030" strategiyasi doirasida aholining sog‘lig‘ini yaxshilash, kasalliklarning oldini olish va ona hamda bola salomatligini mustahkamlash ustuvor yo‘nalish sifatida belgilangan. Bu haqda Zamin.uz xabar berdi.
Ushbu strategiyaga ko‘ra, aholini zarur vitamin va mikroelementlar bilan to‘liq ta’minlash choralari ko‘riladi. Xususan, 3–15 yoshdagi bolalar yod preparatlari, 15–35 yoshdagi xotin-qizlar esa polivitaminlar, temir va foliy kislotasi bilan tibbiy ko‘rsatma asosida bepul ta’minlanadi.
Strategiya maqsadlari orasida onalar va bolalar o‘limini kamaytirish, bolalar orasida kasalliklarni qisqartirish va umumiy sog‘liq darajasini yaxshilash masalalari alohida qayd etilgan. Jumladan, bolalar o‘rtasida yuqumli va yuqumsiz kasalliklarni 10 foizga qisqartirish, go‘daklar o‘limini 6,5 promillegacha, besh yoshgacha bo‘lgan bolalar o‘limini esa 9 promillegacha kamaytirish rejalashtirilgan.
Shuningdek, 6–23 oylik bolalarni mikronutriyent kukuni bilan bepul ta’minlash hamda 2–10 yoshdagi bolalar orasida gelmintoz kasalligini 15 foizga kamaytirish bo‘yicha amaliy ishlar olib boriladi. Tug‘ruq xizmatlarining sifati oshirilishi va tug‘ruq o‘rinlari sonini 14 373 taga yetkazish ham strategiya doirasida ko‘zda tutilgan.
Mazkur chora-tadbirlar orqali aholining zarur vitamin va mikroelementlar bilan ta’minlanishi, profilaktika ishlarining samaradorligi oshishi va sog‘lom avlodni tarbiyalashga zamin yaratilishi kutilmoqda (manba: zamin.uz).
