Qodirov: Migrantlar Rossiyadagi xavfni jiddiy baholashi kerak
O‘zbekiston parlamenti deputati va "Milliy tiklanish" partiyasi yetakchisi Alisher Qodirov Rossiyada o‘zbekistonlik mehnat migrantlariga bo‘lgan munosabat va so‘nggi voqealar yuzasidan o‘z fikrini bildirdi. Bu haqda Zamin.uz xabar berdi.
U ayniqsa, Rossiyada antimigrant reydlari hamda bir o‘zbekistonlik fuqaroning halok bo‘lgani haqidagi xabarlar ortidan keskin bayonot berdi. Qodirovning so‘zlariga ko‘ra, Rossiyada mehnat migrantlari uchun sharoit yomonlashishda davom etmoqda.
U bu vaziyatni zudlik bilan o‘zgartirish zarurligini ta’kidlab, vatandoshlarimizni hushyorlik bilan harakat qilishga chaqirdi. “Markaziy Osiyodan kelganlarga Rossiyada tobora iqtisodiy resurs emas, balki tahdid sifatida qaralayapti”, — dedi Qodirov.
Shuningdek, u o‘zbekistonliklarni Rossiyadagi xavf-xatarlarni jiddiy baholashga undab, quyidagi fikrlarni qo‘shimcha qildi: “Aqlni ishga soling va imkon qadar tezroq Rossiyadan chiqib keting. Hech qanday daromad ota-onangiz va bolalaringizning ko‘z yoshlariga arzimaydi.” Alisher Qodirovning bu bayonoti Rossiyada yashayotgan o‘zbekistonliklarga o‘z xavfsizligi va farovonligini birinchi o‘ringa qo‘yish zarurligini yana bir bor eslatib o‘tdi.
Manba: One.uz
