Farg‘onalik Otabek Komilov MBZUAIga to‘liq grant yutdi
Farg‘ona shahridagi Prezident maktabining 11-sinf o‘quvchisi Otabek Komilov dunyoning eng nufuzli universitetlaridan biri — Mohammed Bin Zayed University of Artificial Intelligence (MBZUAI)ga to‘liq grant asosida o‘qishga qabul qilindi. Bu haqda Zamin.uz xabar berdi.
Mazkur universitet sun’iy intellekt sohasiga ixtisoslashgan bo‘lib, QS xalqaro reytingiga ko‘ra, ushbu yo‘nalishda dunyoning eng yaxshi 10 universiteti qatoridan o‘rin olgan. MBZUAI universiteti o‘quvchilarga yiliga 45 ming AQSh dollari miqdorida grant ajratadi.
To‘rt yil davomida bu ko‘rsatkich umumiy 180 ming AQSh dollarini tashkil etadi. Otabek bu imkoniyatni qo‘lga kiritgan holda nafaqat o‘zining, balki Farg‘ona viloyati va O‘zbekistonning ham faxriga aylangan.
Otabek Komilovning erishgan yutuqlari e’tiborga loyiq. U IELTS imtihonidan 7 ball olgan, shuningdek, xalqaro miqyosdagi AMC (Amerika matematika olimpiadasi) va SEAMO (Janubi-Sharqiy Osiyo matematika olimpiadasi) musobaqalarida oltin medalga sazovor bo‘lgan.
Bundan tashqari, Otabek V2E nomli sun’iy intellekt loyihasining asoschilaridan biri sifatida ham tanilgan. Ushbu muvaffaqiyat yosh avlod uchun katta ilhom manbai bo‘lib, O‘zbekiston yoshlari o‘z imkoniyatlarini yanada kengroq ko‘rsatishlariga dalda beradi.
Manba: zamin.uz
