O‘zbekistonda har yili 200 mln daraxt ekiladi
O‘zbekistonda ekologik muhitni yaxshilash va aholi uchun qulay yashash sharoitlarini yaratishga qaratilgan “Yashil makon” umummilliy loyihasi ishlab chiqildi. Bu haqda Zamin.uz xabar berdi.
Ushbu loyiha “O‘zbekiston–2030” strategiyasining muhim tarkibiy qismi hisoblanadi. Loyiha doirasida mamlakatda ekologik muammolarni kamaytirish, shahar va hududlarda yashil maydonlarni kengaytirish hamda mikroklimatni yaxshilash asosiy maqsad sifatida belgilangan.
Loyiha bo‘yicha har yili 200 million tup daraxt ekilishi va ularning parvarish qilinishi rejalashtirilgan. Bu orqali mamlakatda ko‘kalamzorlashtirish jarayoni sezilarli darajada kengayadi.
Shahar hududlarining yashil maydonlar bilan qoplanish darajasini 30 foizga yetkazish ko‘zda tutilgan. Bundan tashqari, 1023 ta yangi yashil bog‘lar tashkil etilib, ular ekologik xavflarni kamaytirish va suv ta’minotini yaxshilashga xizmat qiladi.
Korxonalar tomonidan har yili 10 million tup daraxt ko‘chati ekiladi, bu esa sanoat hududlarida “yashil belbog‘”lar barpo etishga yordam beradi. Toshkent shahrida esa 4450 gektar yangi yashil maydonlar tashkil etilishi rejalashtirilgan.
“Yashil makon” loyihasining o‘ziga xos jihati shundaki, u nafaqat daraxtlarning ekilishi, balki ularning to‘g‘ri parvarishi va sug‘orish infratuzilmasini yaratishni ham o‘z ichiga oladi. Bu esa ekologik barqarorlikni ta’minlashga xizmat qiladi.
Loyiha natijasida O‘zbekistonning ekologik holati yaxshilanib, aholiga qulay yashash muhiti yaratiladi. Manba: Zamin.uz
