O‘zbekistonlik talabalar Arizona universitetida oltin medal oldi
"El-yurt umidi" jamg‘armasi stipendiatlari Abdulaziz Vahobov va Samandar Erkinov AQShning Arizona universitetini muvaffaqiyatli tamomlab, akademik yutuqlari uchun oltin medallar bilan taqdirlandilar. Bu haqda Zamin.uz xabar berdi.
Ularning har ikkisi universitetning eng yuqori ko‘rsatkichga ega bitiruvchilari qatoriga kiritilgan. Ma’lum bo‘lishicha, Abdulaziz Vahobov universitetni "Honors degree" darajasida tamomlagan.
Bu daraja universitetda "qizil diplom"ga teng bo‘lib, eng yuqori akademik mukofot hisoblanadi. U bitiruv marosimida sahnaga chiqib, minnatdorchilik bildirdi va O‘zbekiston rahbariyatiga ham alohida murojaat qildi.
Samandar Erkinov esa Arizona universiteti qoshidagi Eller College of Managementni "Iqtisodiyot" yo‘nalishi bo‘yicha tamomlagan. U "Economics Outstanding Senior" unvoniga sazovor bo‘lib, yilning eng yaxshi bitiruvchisi deya e’tirof etilgan.
Bu unvon mazkur yo‘nalishda joriy yilda berilgan yagona mukofot bo‘lib, Samandar uni qo‘lga kiritdi. Shuningdek, u bitiruv marosimida o‘zbek tilida nutq so‘zlab, mehmonlarni qutlagan.
Bu yutuqlar nafaqat ushbu talabalar, balki butun O‘zbekiston yoshlari uchun katta faxrdir. Manba: zamin.uz
