2025 yil O‘zbekistonda eng issiq yillardan biri bo‘ldi
O‘zgidromet ma’lumotlariga ko‘ra, 2025 yil O‘zbekiston hududida kuzatuvlar tarixidagi eng issiq yillardan biri sifatida qayd etildi. Bu haqda Zamin.uz xabar berdi.
U 2016 va 2023 yillar bilan bir qatorda tilga olinmoqda. Yil davomida havo harorati odatdagi me’yoriy ko‘rsatkichlardan 1–2 daraja yuqori bo‘lib, ayrim oylar, xususan, aprel va may oylarida bu farq 4,5 darajagacha yetgan.
Yil davomida yog‘ingarchilik miqdori ham odatdagidan sezilarli darajada kam bo‘ldi. Apreldan noyabrgacha bo‘lgan davrda qurg‘oqchilik kuchliroq sezilib, yomg‘ir va qor miqdori me’yordan ikki barobar past bo‘lgani qayd etilgan.
Biroq, dekabr oyida vaziyat o‘zgarib, Toshkent va unga qo‘shni hududlarda yog‘ingarchilik sezilarli darajada ortgan. Bu oy poytaxt uchun so‘nggi 25 yildagi eng yomg‘irli va eng qorli dekabr bo‘ldi.
Tog‘li hududlarda dekabr oyining oxirida qor qoplami 85 santimetrga yetgan. Bu esa Kamchiq dovoni va Chimyon hududlarida tez-tez qor ko‘chkilari yuz berishiga sabab bo‘lgan.
Shuningdek, dekabr o‘rtalarida qisqa muddatli sovuq to‘lqin kuzatilganiga qaramay, oy umumiy hisobda me’yordan iliqroq bo‘lib o‘tgan. Ma’lumot manbasi: O‘zgidromet.
