O‘zbekiston yashash xarajatlari bo‘yicha eng arzon davlatlar qatorida
Numbeo tomonidan o‘tkazilgan global reyting natijalariga ko‘ra, O‘zbekiston yashash xarajatlari bo‘yicha eng arzon mamlakatlar ro‘yxatidan joy oldi. Bu haqda Zamin.uz xabar berdi.
Ushbu ro‘yxatga Markaziy Osiyodagi boshqa davlatlar, jumladan, Qozog‘iston, Tojikiston va Qirg‘iziston ham kiritilgan. Reytingda jami 155 ta davlat qamrab olingan bo‘lib, taqqoslash uchun Nyu-York shahri “100” indeks nuqtasi sifatida asos qilib olingan.
Indeks qanchalik past bo‘lsa, ushbu mamlakatda yashash shunchalik arzon hisoblanadi. Reytingni tuzishda ijara haqi, kommunal to‘lovlar, oziq-ovqat mahsulotlari narxi, restoran xizmatlari va aholining xarid qobiliyati kabi omillar inobatga olingan.
Markaziy Osiyo davlatlari o‘rtasida ko‘rsatkichlar quyidagicha: Qozog‘iston 29,8 indeks bilan 128-o‘rinni egallagan. Tojikiston 27,9 indeks bilan 136-o‘rinda, O‘zbekiston 27,3 indeks bilan 138-o‘rinda, Qirg‘iziston esa 27,3 indeks bilan 140-o‘rinda qayd etilgan.
Hudud bo‘yicha eng yuqori xarid qobiliyati Qozog‘istonda qayd etilgan bo‘lsa, eng past ko‘rsatkich Tojikistonga tegishli. Biroq, yashash xarajatlarining past bo‘lishi har doim ham mamlakatda turmush darajasi yuqori ekanini anglatmaydi.
Xarid qobiliyati va narxlar darajasi o‘rtasidagi farqlar aholining real daromadlari bilan bog‘liq. Manba: one.uz
